Lev 25 | ZomZIV | STEP | TOPA in Sinai Vum ah Moses hopih a,

Leviticus 25

Sabbath Kum

1 TOPA in Sinai Vum ah Moses hopih a, 2 “Israel-te hopih inla amaute tungah, ‘Keimah in note kong piak ding leitangah na lut uh ciangin a leitang mahmah in zong TOPA sabbath a tang ding hi. 3 Kum guk sung na lo uh pawi un; kum guk sung mah na lengguite uh heuh unla a gah khawm un. 4 Ahi hangin a kum sagihna kum TOPA sabbath leitang in sabbath khawlna a nei ding hi. Na lo uh pawi loin na lengguite uh heuh kei un. 5 Ama thu-a po aliite panin la kei unla na hon loh uh lenggah lo panin a gah lo kei un. Tua leitang kum khat a khawl ding hi. 6 Tua sabbath kum sunga leitang pana piang gah peuhmah na an ding uh - note, na sila numei, sila pasal-te uh, nasema na cialte uh le note laka hong teng pakte 7 le na gankhawite uh le na gam sungua om gamsate ading hikhawm hi. Leitang pana piang peuhmah nek theih ahi hi.

Jubilee Kum

8 “‘Sabbath kum, kum sagih - kum sagih mun sagih - sim un; tua bangin sabbath kum sagih, kum sawmli le kua hun sung hi ding hi. 9 Tua ciangin a kha sagihna a nisawm ni-in mun khempeuh ah pengkul gingsak un; Thoihdamna Ni-in na gam pumpi-uah pengkul gingsak un. 10 A kum sawmngana kum sehtuamin siangthosak unla gamsung khempeuh a tengte khempeuh tungah suahtakna tang ko un. Tua in note adingin Jubilee ahi hi; note khatpeuh innkuante neihsa le amau beh ciatah a ciah ciat ding uh hi. 11 A kum sawmngana kum note adingin Jubilee hi ding hi; lo pawi kei unla ama thu-a po ante panin la loin na cin loh uh lenggui panin lo kei un. 12 Ahang in, Jubilee khat hi a, no adingin a siangtho hi ding hi, lolai pana kila tektekte bek ne un. ^a

13 “‘Hih Jubilee kumin a kuamahpeuh amau gam ciatah a ciah ciat ding uh hi. ^b

14 “‘Na gamsung mi khat tungah leitang na zuak ahikeh na lei leh, khat le khat hamphat na kituh kei un. 15 Na gamsung mi khatpeuh tung panin na lei leh Jubilee kum pan a kum phazah tuatin na lei ding hi. Amah in zong an kum bangzah kila thei lai ding hiam cih tuatin nang hong zuak ding hi. 16 A kum a tam ciangin aman na khangsak dinga, a kum a tawm ciangin aman na khiam ding hi; bang hang hiam cih leh amah in nang hong zuak taktak pen a an kila ding zah hizaw hi. 17 Khat le khat hamphat kituh loin na Pasian uh kihta zaw un. Keimah TOPA note Pasian ka hi hi. ^c

18 “‘Ka thukipte zui unla, ka thukhamte limtakin mang un, tua hileh na gamuah lungmuang takin na teng ding uh hi. 19 Tua ciangin leitang in gah gahkhia in gilvahtakin na ne ding uh a, tua lai-ah lungmuang takin na teng ding uh hi. 20 Nang, “Lo pawi loin i ante la kei lehang a kum sagihna kumin bang i ne ding hiam?” ci-in nong dong thei hi. 21 Keimah in kum thum sung nek khop ding a kum gukna kumin leitang in gah a gah nadingin thupha kong puak ding hi. 22 A kum giatna na pawi laitakun kumlui-a ante na ne ding uh a, a kum kuana anlak hun dong na khom ding uh hi. ^d

23 “‘Neih den dingin tua leitang na zuak kei ding uh hi, bang hang hiam cih leh tua leitang kei aa hi a, note pemta, lo khawhlawhte na hi uh hi. 24 No neihsa banga na let uh leitang khempeuh ah leitang tatna na bawl pelmawh ding uh hi. ^e

25 “‘Note gammi khat zawngin a neihsa pawlkhat a zuak leh ama kitanaupih penpen pai-in tua gammipa zuaksate a tan ding hi. 26 Bangbang ahi zongin tua mipa in a tatsak ding mi a neih kei a, amah hau kikin a tan zo dingin a om leh 27 a zuak nung kum phazah tuatin a man ding kiciangtan dinga, a val laiteng a zuaknapa tungah a kipia kik ding hi; tua ciangin ama neihsa leitang nei kik thei ding hi. 28 Ahi hangin amah in a loh nading acing a neih zawh kei leh tua a mun zuaksa pen a leipa khutah Jubilee Kum dong a om ding hi. Jubilee ciangin amah kipia kik dinga, tua ciangin amah ama munah a ciah kik thei ding hi.

29 “‘Mi khat in kulha ki-um khuapi sungah inn a zuak leh, a zuak nung kum khat sung a tat kik theih nading thu a nei hi. Tua hun sungin tankik thei hi. 30 Kum khat hul sungin a tat kik kei leh tua kulha ki-um khuapi sunga inn pen a leipa le ama suante in a tangden ding uh hi. Tua pen Jubilee hun ciangin kipia kik lo ding hi. 31 Ahi hangin kulha ki-um lo khua neute-a innte ahileh gamsung banga kingaihsun ahi hi. Tuate kitan kik thei dinga, Jubilee ciangin kipia kik ding hi.

32 “‘Levi-te in amau Levi khuapi sunga amau neihsa innte a tawntungin tat kik theihna thu a nei uh hi. 33 Tuaci-in Levi-te neihsa kitan thei hi - tua pen, amau let khuapi sunga inn khatpeuh hi a - Jubilee cianga piak kik ding ahi hi, bang hang hiam cih leh Levi-te khuapi sunga innte pen Israel-te laka amau neihsa ahi hi. 34 Ahi hangin amau khuapi gantatna gam a kizuak peuhmah kei ding hi; amau neihden ahi hi. ^f

35 “‘Na gamsung mi uh no laka teng khat zawngin a kivak zawh kei leh, no lakah a tensuak theih nadingin, pemtate ahikeh hong tam pakte na huh ding bangun huh un. 36 Ama tung panin a met ^{▼▼25.36 Ahikeh amet lua-in tg. 37 tawh kibang} bangmah la kei un. Tua sangsikin na gammipa no lakah a tensuak theih nadingin Pasian kihtazaw un. 37 A metin sum na leitawi kei dinga, a metin an na zuak kei ding hi. 38 Keimah TOPA note Pasian, Canaan gam hong pia-in note Pasian ahi dingin Egypt pana hong paikhiatpihpa ka hi hi.

39 “‘Note lakah gammi khat zawngin note tungah hong kizuak leh sila bangin na semsak kei un. 40 Amah nasema kicial bang ahikeh no laka inn hong nei pakte bangin na bawl ding uh hi; Jubilee Kum a tun mateng na na uh a sem ding hi. 41 Tua hun ciangin amah le a tate kisuaktasak dinga, amah a behte lakah ciak kikin a pupa gamah a ciah kik ding hi. 42 Bang hang hiam cih leh Egypt pana kong paikhiatpih Israel-te ka nasemte ahi hi; amaute sila-in a kizuak peuhmah kei ding hi. 43 Amaute ngong uk loin na Pasian uh kihta zaw un.

44 “‘Na sila numei le pasalte uh note kima minamte pan ahi uh hi; amaute panin sila na lei thei uh hi. 45 Note in no laka hong teng pakte le no gam sunga suak amau behte na lei thei ding uh a, amaute no neihsa suak ding uh hi. 46 Note in amaute na tate uh gou na luahsak thei uh a khantawn sila in lah na koih thei uh hi. Ahi hangin na Israel mipihte uh tungah ngong uk kei un.

47 “‘Note laka teng pak khat ahikeh pemta khat hau-a, no gammi khat a zawna no laka teng pemta khat ahikeh pemta beh a mi khat tungah a kizuak leh 48 amahmah a kizuak khitin amah kitankhia kik thei ding hi. Ama tanau khat in amah tan thei hi: 49 A pa sanggampa ahikeh a pa sanggampa tapa ahikeh ama beh sunga sisan a kinaipih khatpeuh in amah tan thei ding hi; tua hi loin amah a hauh leh amah le amah kitan thei ding hi. 50 Amah le amah a leipa in amah a kizuak kuma kipan Jubilee Kum dong a hun tuat ding uh hi. Amah a kikhahkhiat nading sum pen, tua kum sungteng a kicial mipa thaman bulphuhin kituat hi ding hi. 51 Kum tampi in a sap lai leh ama kitatna man ding zah sanga tamzaw a pia ding hi. 52 Jubilee Kum ma kum tawmno in a sap lai leh tua pen tuat khia in a kitatna sum ding a pia ding hi. 53 Amah pen a kumkuma kicialtawm mite banga bawl ding ahi hi; amah a neipa in amah a ngong uk ding na vil pelmawh ding hi.

54 “‘Hici bang zia-in amah a kitat kei leh zong, Jubilee Kum in amah le a tate a kikhahkhia ding hi; 55 ahang in, Israel-te pen keima nasem bang ahi hi. Amaute Egypt pana ka paikhiatpih ka nasemte ahi uh hi. Keimah TOPA note Pasian ka hi hi.